Mostramos unha ampla selección de cartas e tarxetas postais que chegaron aquí dende fai máis dun século, particularmente de Avellaneda en Bos Aires e de Villa del Cerro en Montevideo, que foron os centros principais dos sonenses emigrados.

Esta correspondencia reflicte a cotiandade, as alegrías, a morriña, as arelas e as diversións de xente común que aspiraba a un porvir en urbes de progreso, a unha felicidade simbolizada en escenas de namoramento e candidez reproducidas en felicitacións de aniversarios e de Nadal. Estas letras adoitaban acompañarse de retratos, moitos en poses de estudo con ocasión de vodas, bautizos e outros momentos claves do ciclo vital. Tamén hai fotos que nos dirixen cara aos espazos laborais, fálannos das afeccións e dos novos rituais civís dos nosos emigrantes, como foi o asado ou o paseo dominical pola rambla de Mar do Prata.